دەتەوێ فێری شتی نوێ ببیت؟
دەتەوێ سەرگەرمیەکت هەبێت؟
دەتەوێ لەگەڵ کەسانی نوێ ئاشنا ببیت؟
kansalaisopisto (تێکەڵێکە لە دوو وشەی kansalainen کە بە فینلاندی یانێ «هاووڵاتی»، و opisto، کە بە فینلاندی یانێ «ناوەندی خوێندن»)، ڕێکخراوێکی پەروەردەییە کە کۆرسی جۆربەجۆر ڕێک دەخات کە بەشداریکردن تیایاندا بۆ هەموو دانیشتوانی فینلاند ئازادە. کۆرسەکان بۆ هەموو کەسێک کراوەن، بێ لەبەرچاوگرتنی تەمەن و مێژووی خوێندنیان. فێربوون بەپێی ئارەزووی هەرکەسێک بۆ فێربوونی شارەزایی نوێیە و ئامانج وەرگرتنی بڕوانامەی ڕەسمی نیە. تۆ دەتوانیت بە تەنیایی یان لەگەڵ هاوڕێیەک یان خزمێک لە کۆرسەکە دا بەشداری بکەیت.
هەندێ لە خولەکانی kansalaisopisto تەنانەت گونجاون بۆ ئەو بەشداربووانەی کە زۆر زمانی فینلاندی نازانن. لە kansalaisopisto هەروەها خولی زمانی فینلاندی بەڕێوە دەچێت. دەتوانیت هەر لە بنەڕەتیەوە دەست پێ بکەیت، شارەزایی زمانی فینلاندیت باشتر بکەیت یان لە خولێک دا بەشداری بکەیت کە تەرکیز دەکاتە سەر ئاخافتنی فینلاندنی. هەروەها هەندێ خول هەن کە بۆ بەشداریکردن تیایاندا پێویستە زمانی فینلاندی بە باشی بزانیت.
لە سەرانسەری فینلاند 200 kansalaisopisto هەن. ناوی فینلاندیی هەر kansalaisopistoیەک هەروەها ڕەنگە وشەی «työväenopisto» یان «aikuisopisto» یان تەنها «opisto»ی تێدا بێت.
چەند نموونە لەو خولانەی کە لە kansalaisopisto هەن:
– پیشە دەستیەکان (وەکوو دروومان و چنین، دارتاشی، کانزاکاری و هونەری دەستی)
– مووزیک (وەکوو گۆرانیوتنی دەستەیی، گۆرانیوتنی تاک و ئامێرە جۆربەجۆرەکان)
– چێشتلێنان (وەکوو فەرهەنگی خۆراکی فینلاند، خۆراکی سەوزەخۆران، نانکردن و پێداویستیە خۆراکیە تایبەتەکان)
– زمان (وەکوو فینلاندی، ئینگلیزی و ژاپۆنی)
– وەرزش و ڕاهێنانی جەستەیی (وەکوو یۆگا، سەما، لەشجوانی و ژیمناستیکی ژنان)
– هونەر (وەکوو ڕەنگکاری، ڕەسمکێشان، سەرامیک)
– تەکنەلۆژیای زانیاری (وەکوو بەکارهێاننی کۆمپیۆتر، وێنەگری و نەرمامرازە جۆربەجۆرەکان)
خولەکانی هەر ناوەندێک جیاوازن و یەک خول لە هەموو ناوەندێکی kansalaisopisto پێشکەش ناکرێت. ئەو خولانەی کە بڕیارە لە نیوساڵی پاییز پێش کەش بکرێت ئاساییانە لە مانگی ئۆگست ڕادەگەیەنرێت.
ماوەی خولەکان ئاساییانە یەک نیوساڵە، یان بەهار یان پاییز. زۆربەی خولەکان هەفتەی جارێک بەڕێوە دەچن، یان ڕۆژ یان شەو، و هەر جار دوو کاتژمێرە. هەروەها هەندێ خول لە کۆتایی هەفتە دا بەڕێوە دەچن. هەروەها لە kansalaisopisto هەندێ وتار لەبارەی بابەتی جۆربەجۆر پێشکەش دەکرێن. کرێی هەریەک لە خولەاکن ئاساییانە چەند دە یۆرۆ یە، و هەندێ لە خولەکان ڕەنگە بەخۆڕایی پێشکەش بکرێن.
نزیکترین kansalaisopisto لە خۆت لەسەر ئەم نەخشە بدۆزەوە. لە هەمان پەڕە لینکی ماڵپەڕەکانی kansalaisopisto و زانیاریەکانی تری پەیوەندیکردن هەیە. زانیاری لەبارەی ئەو خولانە کە پێشکەش دەکرێن لەسەر ماڵپەڕی هەریەک لە ڕێکخراوەکان هەیە. تۆ دەتوانیت پەیوەندی بکەیت بە نووسینگەی kansalaisopisto بۆ وەرگرتنی زانیاری لەبارەی ئەو خولانەی کە بۆ تۆ گونجاون. نووسینگەکانی kansalaisopisto هەروەها خزمەتەکانی مشتەری بە لانیکەم دوو زمانی فینلاندی و ئینگلیزی پێشکەش دەکەن. بۆ زانیاریی زیاتر لەبارەی چۆنیەتیی ناونووسین، تکایە پەیوەندی بکە بە نووسینگەی kansalaisopisto یان لێرە کلیک بکە (تەنها بە زمانی ئینگلیزی هەیە).
ئێمە چاوەڕوانین کە لە kansalaisopisto تۆ ببینین.
خولەکانی kansalaisopisto لە پیشە دەستیەکانەوە بگرە هەتا مووزیک، چێشتلێنان، زمان، وەرزش و هونەر لە خۆت دەگرێت.
